毒舌

唔知點解，呢排 (剩係呢排!?)俾D同事話我真係毒舌，咁我當然唔認啦，我明明只係講野比較一針見血，而且見親血都會封喉之嘛，邊度去到毒舌咁嚴重呢!

為左我既清白，我就走去上網查左一查「毒舌」呢樣野。

第1個查到既好明顯一定岩，「毒舌」 = 「有毒既舌頭」。 嗯，呢個我唔多解釋，因為應該一睇就明。

第2個，毒舌係黎自日文裡面「毒舌(どくぜつ)」，呢個應該係動漫界生活既朋友會見得比較多。有咩動漫以「毒舌」屬性設定既角色我就唔多作介紹了，簡單講，「毒舌」就係比較尖酸刻薄，加上使用帶有諷刺屬性既必殺技，一擊必殺咁命中目標 (可能係地圖炮)，令人冇得反擊，倒地而亡 !

請謹記一樣野，「毒舌」並唔係講粗口或者隨便亂鬧人，要運用智慧架!

咁我終合以上既廢話，好自我咁將「毒舌」分左3級，係初、中、高級，唔係1、2、3級!

初級毒舌 — 裝備此技能既玩家(!?)，因為技能等級較低，容易做成冷場，及大量增加仇恨值，會被敵人冠以「口臭」、「白木」等稱號。建議玩家多對鏡練習及勤刷牙，如有多餘屬性點，請大量投入在智力上。

中級毒舌 — 裝備此技能既玩家已有一定既智力屬性，有一定既機會發動冷凍及必殺效果。但因為等級未提升至最高，未能看清形勢及切入既時機，胡亂使用地圖炮，會有機會反被敵人來1個Counterattack (逆襲)，而出師未捷身先死。建議玩家把智力提升之餘，可把屬性點投資在「面皮」屬性上，提升表面防禦力。

高級毒舌 — 裝備此技能的玩家，因為已把智力及面皮升至高水平，能有效地看清敵人的弱點發動會心一擊；而且因把「面皮」屬性提高，可以得到冷面的效果，無論是發動或受到攻擊，都能冷面以對，一副事不關己既模樣把一切敵人秒殺。

所以根據以上論點，我最多都只係中級有餘、高級未滿嘛，點可以俾人叫做「真係」毒舌呢!!

p.s. 以上純粹個人意見，如真係講中，請勿對號入座!!!